31 mayo 2011

El cultivu del maiz

Carru'l pais con los lladrales o esquirpies
Dellos apuntes sobre'l cultivu del maiz en Villaescusa y otros pueblos del conceyu de Colunga basaos principalmente nes mios propios recuerdos.
El maíz fue seguramente el cereal mas cultiváu en Villaescusa y nos demás pueblos del conceyu de Colunga, durante la mayor parte del pasáu siglu XX. La descripción que de su cultivu fago equí eye valida hasta los años 60 del pasau siglu, a partir de los años 70 con la llegada de la maquinaria a los pueblos y aunque el proceso era mas o menos el mismu, la forma de hacerlo cambio totalmente. Na actualida ya no se cultiva el maíz para el consumu humanu y lo único que se planta ye pa alimentar al ganau.

El procesu del  cultivu del maíz extendiaese  dende la Primavera hasta’l otoñu, durante el mes de marzu diben preparándose les finques pa semar el maíz, la primer llabor a realizar era cuchar les tierres, ye dicir abonales con cuchu, onde se diba a semar el maíz, pa ello utilizabase el carru'l país, formau pa esti trabayu con los lladrales ó esquirpies), que eren una especie de caxón en forma de “U” fechu con vares d'ablanar al estilu de los cestos, que s'asitiaba sobro'l carru pa evitar qu'el cuchu se cayéra, el carru'l país, cargabase de cuchu, utilizando pa ello la traenta, una vez cargáu llevabase hasta la finca tiráu por vaques o gües, ellí díbase descargando en pequenos montones asitiaos a intervalos regulares,  pa descargar el cuchu, utilizábase una ferramienta llamada el garabatu, una especie de traenta, pero nesti casu colos dientes formando un ángulu de noventa graos respecto del mangu, colo que se facilitaba la descarga del carru, dempués utilizando la traenta espardíense los montones de cuchu cubriendo tola finca.
Llabrando una finca



El siguiente llabor a realizar era llabrar  la tierra, consistía en voltiarla utilizando pa ello l'aráu o llabiegu, esti llabor era realizada por dos o trés persones, el llabrador era la persona que conducía el llabiegu que diba tiráu por una pareya de vaques o gües, delantre d'estos, diba otra persona que los guiaba  siguiendo les instrucciones del llabrador, en delles ocasiones una tercera persona diva  echando'l cuchu nel riegu pa facilitar la tarera. Una vez que se llabraba la tierra había que dexala dellos díes para que se ventilara y ensugáse bien.
Nos últimos díes del mes d'abril, o primeros de mayu, cuando la tierra taba seca y se prevía que nun diba llover se semaba el maíz, pa ello, el semador echaba la simiente del maíz nun cestu y diba tirandolo al voleo intententando que quedara espardida uniformemente pela tierra, una vez semáu'l maíz habia que rastrar la tierra, llabor que consistía en desfaer los tarrones y dexar la tierra dafechu lisa y el maíz semáu cubiertu de tierra, pa ello utilizabase'l rastru, que consistía nun armazón fechu de madera que llevaba nel mediu un rodiellu tamién de madera travesáu por dellos pinchu de fierro, el rastru diba tiráu por una pareya de vaques o gües  y sobre él subíense una o dos persones pa que'l so pesu fijase el rastru  escontra la tierra  y al tirar de el, el rodiellu colos pinchos de fierru giraba y desfaía los tarrones dexando la tierra dafechu lisa.

Durante el mes de mayu, una vez que'l maíz naciera y cuando alcanzaba una altura de unos quince centímetros, habia que  sallar el maiz, que consistía en quitar les males herbes  y ralear convenientemente el maíz para que nun quedara demasiau espesu y desenvolviérase bien, esto realizábase cola fesoria, esta llabor solíase facer de andecha, lo que significa que cada día tolos vecinos diben a sallar pa unu d'ellos, d'esta manera toos xuntos facíen el trabayu de toos.


Maizal en veranu
Nel mes de xunu faciase la ultima llabor del maíz antes de dexalo crecer durante tol branu, esti llabor era arrendar y consistía n'arimar la tierra al raiz de les plantes col fin d'asegurales y evitar no posible que'l vientu pudiera tirales, esta tarea lo mesmo que sallar  realizase con la fesoria y muches veces tamién pol procedimientu de la andecha.

Durante el branu elmaíz desenvolvíase rápido llegando les plantes a alcanzar los dos metros d'alto y empezaben a brotar les panoyes, durante la ultima quincena d'agostu espigabase el maíz, que consistía en cortar los maízos xusto percima de la panoya, esto facíase pa evitar qu'esta parte de la planta quitára-y fuerza a la panoya y esta desenvolviérase meyor, esta parte de la planta que se cortaba llamábase el nerbasu y utilizábase p'alimentar el ganáu.
Maizal en otoñu


A partir d'esti momentu dexábase madurecer el maíz hasta mediaos d'ochobre que era cuando s'empezaba, a recoyer la cosecha, pa ello usábase la macona que ye una cesta grande fecha de banielles y que facíen los cesteros, coyíense les panoyes una a una y echábense na macona, cuando esta se llenaba se vaciaba nel carru’l país, que primeramente se habia llevau hasta la finca, cuando se terminaba de recoyer le panoyes, se  cortartaben les plantes del maíz y díbense arrexuntando en grandes manojos llamaos gabielles, estes arreyábense y asitiábense de pies unes sofitaes n'otres formando montones llamaos gabellones, estos dexábense na finca pa que secaren dafechu y usábense nel Iviernu como alimentu seco pal ganáu.

El carru co les panoyes, llevavase  hasta la casa ó hasta dalgún otru local cercanu onde se facia  un gran montón y onde más tarde se llevaría a cabu la esbilla ó esfoyaza, que consistía en quitar la mayor parte de les fueyes a les panoyes, dexando trés ó cuatro de les más fuertes col fin de poder enrriestrarles, esta tarea como tantes otres faciase de andecha, pero nesti casu faciase  po les nueches, durante la cosecha del maíz, cada nueche había esbilla en casa de dalgún vecín y ellí diben tolos demás pa realizar esta tarea, les muyeres sentábense alredor del montón de (panoyes) y empezaben a quitar les fueyes, los homes subianse al montón y facíen les riestres, cuando se terminaba la esbilla, los homes colgaben les riestras de panoyes nel corredor de la casa si esta disponía del, y si nón a otru día colgábense nel horru.
Horru co les riestres del maiz
Cuando en casa de cada vecín terminaba la ultima esbilla del añu, esti invitaba a los sos convecinos a un pequeñu convite, que xeneralmente consistía en castañes asaes, nueces, sidra dulce, galletes, café, licores etc., el conxuntu d'estes viandes conocianse col nome de la garulla.
Les riestres del maíz dexábense colgaes del corredor ó del horru'l tiempu necesariu por que'l granu secase dafechu, momentu nel que se esgranaben les panoyes pa sacayos el granu, pa esto había una ferramienta que se llamaba el  esgranador, que básicamente consistía nuna chapa de fierro d'unos  cuarenta centímetros de llargu, doblada en forma de semicírculu y unida pelos sos estremos a una pieza de madera, esta ferramienta coyiase cola mono derecha pela zona metálica y restregábase contra la panoya suxeta pola mano izquierda y de esta forma diba desgranandose la panoya, la parte de la panoya que quedaba dempués de quitar el granu llamábase'l tarucu y era utilizáu como combustible nes cocines de leña, el granu de maíz metiase en sacos y guardábase nel horru, cada quince díes llevábase un sacu de maíz al molin pa molelo y convertilo en fariña.
Como puede vese, de la planta del maíz aprovechábase prácticamente tou, col granu alimentaben dellos animales domésticos principalmente les pítes, cola fariña de maíz facíense les tortes ó rosques, la boroña, les fariñes) etc., utilizaes  na alimentación humana, el restu de la planta utilizábase como forraxe pal ganáu y la parte que'l ganáu nun consumía, utilizabase pa mullir les cortes colo que se convertía en cuchu, como queda dichu más arriba la parte de (la panoya) que quedaba dempués de quitar el granu, utilizábase como combustible.

N'homenaxe a toes aquelles persones que durante toa ó parte de la so vida realizaron estes y otros llabores rellacionaos cola caseria tradicional asturiana, contribuyendo col so trabayu, a la meyora y progresu de los sos pueblos, los sos conceyos y en definitiva d'Asturies.


No hay comentarios: