Esto güel a Setiembre

Hoy voi cuntar una anécdota de la que yo fui en parte protagonista, sinón directamente, si por tar onde asocedió y porque una frase qu'ellí se dixo y qu'entós  nun entendí, impactome tantu que siempre la recordé.

Esto sucedió fai mas de 50 años, al pie de la panera que hai en Villaescusa nel “llugar de baxu” y que a dures penes güei tovia se mantien en  pie, era al atapecer d'un día de finales del mes d'agostu, pel  día fixera munchu calor, pero pela tardi la borrina cubriolo tou y empezó a orbayar suavemente, debaxu desta panera pa protexese del orbayu, axuntáronse dellos vecinos, como solíen facer de vez en cuando pa conceyar un pocu y pa falar de les sos coses, yo que era un nenu, andaba per ellí, pues gustabame munchu escuchar  les conversaciones de les persones mayores. 

Durante una pausa na charla, un d'ellos, mientres facia un cigarru dixo una frase que yo siempre recordé, dixo, “esto güel a setiembre” y los demás contestáron-y, ye verdá “esto güel a setiembre”, dempues siguieren falando d'otres coses, yo nun entendía nada, ¿que quedría dicir?,  ¿como podía golese  un mes?, ¿quizas los meses tuvieren golor y yo nun lu sabía?, en  fin que a mi intrigome munchu la frase y seguru por eso quedome grabada pa siempre.

Al pasar el tiempu y faceme mayor entendí que aquel paisanu nun  taba falando en sentíu real sinón que facíalo en sentíu figuráu y que cola frase “esto güel  a setiembre”, nun se refería a nengún golor, sinón que lo que quería dicir era que a la vista de cómo se quedaba aquella apacible tardi d'agostu col so suave orbayar, el veranu tocaba al so fin, y que setiembre y con él, el otoñu, taben al volver la esquina.

Toi escribiendo esto, al atapecer, d'un día de finales  d'agostu, el tiempu dempués de dellos dís de fuertes calores enfrescó bastante, el día tuvo mediu nublau, fai algo de vientu y de vez en cuando quier orbayar, nestes circunstancies fago mia la frase que fai más de cincuenta años dixo aquel paisanu en Villaescusa, y digo, “ESTO GÜEL  A SETIEMBRE”.

En memoria y recuerdu de les persones de Villaescusa yá finaes a les que cuando yo era nenu escúche-yos cuntar munchos refranes, anécdotes, cuentos y hestories.